طوسي سلسلو: طوسي نالي اسلامي تصوف جو طريقو يا سلسلو شيخ علاؤالدين طوسيءَ سان نسبت رکي ٿو. پاڻ طوس (اسپين) جو رهاڪو هو. وقت جو وڏو صوفي شيخ نجم الدين ڪبريٰ هن سلسلي سان لاڳاپيل هو. ٻئي صوفي ساڳي وقت ۾ دوست به هئا. تنهن ڪري گڏجي اچي هڪبئي وڏي صوفي شيخ ابونجيب صوفي سان مليا. هن کين مرشد وٺڻ جي هدايت ڪئي ته پاڻ ٻئي خواجه وجيهه الدين ابوحفص جي درٻار ۾ پهتا. هن بزرگ ٻنهي کي پنهنجي طالبيءَ ۾ ورتو. تعليم مڪمل ڪرڻ کان پوءِ علاءُ الدين طوسي واپس طوس ۾ هن سلسلي کي جاري ڪيو. هن سلسلي جا بزرگ سماع ٻڌندا آهن ۽ وجد ۾ اچي رقص ڪندا آهن. وڏي آواز ۾ ذڪر ڪندا آهن. هنن کي جو ڪجهه ملندو آهي، ان تي قناعت ڪندا آهن. هي سلسلو ڇهن واسطن سان خواجه جنيد بغداديءَ سان ملي ٿو. طوسي سلسلو تصوف جو ٻارهون سلسلو ڳڻجي ٿو.